جزء من مسرحية / هشام الصوفي المزارع : الله يهدكم هد ويدككم دك بعد خدمتنا يكون هذا مصيرنا .. كسرتم أرجلي وأتعبتم قلبي والسكر أرتفع والضغط وصل للعالي والمعاملة مكانها واقفة.. إيش في أكيد أنت داري. الموظف: يا أبي الأول القي التحية المزارع : عادك تشتي تحية .. والله لو بيدي ايش بسوي .. جيت لعندكم برجلي الآن قدنا بالكرسي وصاحبي الثاني بالعكاز يمشي أما الثالث العمى صابه من كثرة الدوار طالعين نازلين طالعين والورق بيداتنا .. والوقاحة أن الاستمارات حقكم كل شيء لكم وعادكم صور الورقة دي نسختين ودي نسخة وعاد بعضهم يقول لا مش دي صور دي وكله من جيوبنا والآلات حقكم تصوروا بها لأحبابكم شوف كم مزارع مبطوح بالأرض من كثرة التعب وهدكم لنا كنا نحلم اننا بنعيش بنعيم وراحة لما نخرج والله لو كنا دارين أن هذا سيكون حالنا كان الانتحار أحسن لنا . الموظف : بدل ما تدور كل هذه الدورة كنت با تعطي لواحد سمسار وهو بيخلص لك المعاملة. المزارع : ليش في سماسرة عندكم .. أنا با عرف أن السماسرة في البورصات والسيارات والعقارات هذي حاجة جديدة سماسرة في المعاملات من شأن اصرف منتوجي الشهري عجب والله عجب. الموظف : اسمع يا والدي أنا بشرح لك انت وأصحابك اسمعوا تمام.. في البداية صلوا على النبي المصطفى .. نحن الآن نعيش في زمن كل شيء فيه معقول والشيء الصحيح هو الذي مش معقول إذا كنت أنت وأصحابك بتعانوا شهر أو شهرين نحن مستمرين في هذه الحالة من سنين .. ياما اشتكينا وياما بكينا ولا واحد استمع لنا .. قطع . المزارع : قد نحنا سمعنا كثير وكنا نقول دول كذابين حتى شفنا وحسينا كل شيء .. واصل واصل بس فهمنا من هم السماسرة. الموظف : طيب ليش انتم مستعجلين كل شيء با قوله ذا الحين .. السماسرة في المزرعة نوعين سمسار خارجي وسمسار داخلي .. السماسرة الخارجيين ولا واحد يقدر يقول حاجة لهم يدخلوا ويخرجوا من المزرعة حسب ما يشتوا والأبواب كلها مفتوحة لهم ولا واحد يقدر يقول لهم ( بمب) أولهم يحمل كيس وعلى رأسه مشدة ويوزع الفل والقرمش.. سكتة يتابع كل شيء واي شيء من فوق لتحت والعكس .. أما الثاني وهذا أقواهم كلهم رغم انه معروف إلا انه وجد قبول في ارض المزرعة ممكن يفحص سلتك و يخرج منها أي شيء مش عاجبك ويتوسط لك عند الذي تشتي ولا يهمك من شيء والذي ما تستطيع أنت تخرجه بالساني يخرجه هو بشكل ثاني .. شوفه موجود في الصبح أو المساء وحتى يومي الخميس والجمعة ودائماً الفوطة حقه مطولاني فاتح الزرار الأول والثاني ويلعص لباني .. أما الثالثة فيا سبحان الواهب فهي حلوة وتشبه بنت الباشا من المسلسلات الرمضاني تتابع أي حاجة وكل حاجة وعلى عينيك يا جاري وبعض الأحيان تعود تستكمل في (....) أما السماسرة الداخليين فهم خمسة يأخذوك إلى غرفة في الطابق الفوقاني وهناك يتم كل شيء بالتفاهم وأنت وحظك بتخرج من رأسك أما نحن الموظفين الكثير منا حقهم مهضوم وإذا طالبت بحقك للتحقيق ساني حتى إذا مرضت لازم أول تخبرهم انك بتمرض والا يغيبوك لاهم لهم الا كيف يعذبوك ويزيدوا من همك ومعاناتك ويفرحوا لما يشوفوا المك او شكوتك خصم من الراتب واذلال قبل صرف أي شيء وكل شيء .. وكل شيء مش موجود هذي السنة الثاني ولا قلم اشتروا لنا ولا ورق ابيضاني والشراء من جيوبنا تصوروا أن المخصص يكمل قبل ما يوصل والامياز مكسرة والكراسي واحد اعرج واحد نركيله دلا دلا اما انتم قد نحنا نشوفكم تبولوا وراء الاشجار وتتبرزوا عند السور لان حماماتكم معدومة بأمر ما ندري كيف ؟ ولو واحد منا اتكلم جواسيسهم توصلهم ساني . المزارع : والله انك بكيتنا اجيت اشتكي لك حالي وجدتك اخس مني .. صبرك بالله واستمع للغنية التي تقول ( دي حكمة الله آية .. لكل ظالم نهاية).المزارع رقم ( 2) رافعا يديه الى السماء ( اللهم أعن هذا الموظف وكل موظفي المزرعة واجعل لهم من كل هم فرجا ومن كل ضيق مخرجا واخلف عليهم بالخير انك على كل شيء قدير ).. الجميع آمين. المزارع : المتقاعد المزرعة: هيئة تقاعد عدن